Hello，大家好，我哋係由韓國人每日提供最新韓國旅行資訊嘅Creatrip。
韓國特別多紀念日相信大家都知，只係情人節都有14個要過 所以喺韓國好容易就會見到唔少花店嘅蹤影，而好多女仔手上都會拎住一紮花，今日小編就想同大家介紹新村兩間花店，喺Naver評分相當之高，大家有興趣嘅話，之後都可以去睇吓㗎！
新村花店1
- 店名：la.belle.fleur （라벨플레르）
- Instagram：la.belle.fleur_
- 營業時間：09:30 - 21:30
- 地址： 서울 서대문구 연세로9길 10-7
- 小Tips：由新村2號出口嚟之後一直直行，經過Starbucks見到藥局喺十指路口轉左，再直行前少少就會見到。
首先第一間要同大家介紹嘅花店，就係Naver排行No.1嘅la.belle.fleur（라벨플레르），5分入面佢評分高達4.68！而且仲有132篇blog介紹過添！當然小編都唔可以錯過，去睇吓佢有幾巴閉啦！
去到門口，大家都可以見到佢出面擺咗啲小盆栽同花束喺出面。
而最近呢一款玻璃花更加係大熱，唔少韓國人都會買佢返屋企使裝飾。
小編喺出面影緊嘅時候，老闆娘好熱心咗打開門叫小編入去再睇多啲。一入到去真係聞到好香嘅鮮花味，令人心情即刻好似放鬆咗好多咁～
入到去可以見到見到另一款大熱嘅小玻璃花球，同樣擺喺屋企做裝飾都好唔錯！
呢度嘅鮮花真係多到數唔曬，基本上大家諗得到嘅花呢度都有得買。
小編亦見到有好多各種大大小小嘅盆栽，每一款價錢都唔算好貴，總有一款會係大家嘅心頭好。
除咗盆栽之外，如果大家都想拎住花周圍去打卡，呢度亦都有比較平價嘅小花束，價錢由￦20,000～￦100,000，相當之抵！
小編喺走之前仲見到老闆娘插緊花，顏色配合得好靚，好適合而家嘅春天！
如果大家之後嚟買鮮花，老闆娘亦會細心咁幫大家包好，絲帶顏色亦有好多款揀～
最後小編都忍唔住買咗一紮返屋企，真係好靚
新村花店2
- 店名：SNOWFOX FLOWRS （스노우폭스플라워 신촌점）
- Instagram： snowfox_flowers
- 營業時間：星期一至四08:30 - 22:00、星期五08:30 - 22:30、星期六10:00 - 22:30、星期日11:00 - 21:00
- 地址： 서울 서대문구 연세로 19
- 小Tips：由2號出口出嚟之後一直直行，佢就係喺Olens隔離。
SNOWFOX FLOWERS係一間連鎖花店，好多地區大家可能都會見過佢嘅蹤影。佢哋賣嘅花價格可以話係超親民，喺Naver上佢嘅評分亦都好高有4.26分！
呢間花店就位於新村嘅大街，所以好容易就會搵到，由鋪頭外頭已經可以見到佢擺滿好多花，價錢一啲都唔貴，小盆栽最平￦2,900就可以帶佢哋返屋企。
香港成日會見到嘅滿天星，大大束都只係￦3,900，拎住佢同櫻花一齊影相真係可以話係超靚～
呢種花叫做香雪蘭，代表住支持你（너를응원해）、行花路（꽃길만걷자）嘅意思，雖然影嘅時候仲未開花，相信如果開咗之後，一定會同相一樣咁靚。
小編去嘅時候亦都見有唔少男仔入嚟買呢啲玫瑰花束俾女朋友，真係好浪漫
入到鋪頭仲可以見到有啲小盆栽，每一款盆栽前面職員都好貼心咁寫上係咩品種、每日要淋幾多水、最好擺喺幾度陽光之外、種嘅難度又高唔高等，大家唔需要擔心唔識種。
而大家如果買鮮花，屋企又冇花樽嘅話都可以喺呢度買，每一個size都有唔同價，￦6,900至￦12,000等。
另外大家仲可以喺度買埋小卡片，或者係一啲已經剪好咗嘅字句卡。
如果喺度買花，大家最後仲可以拎一張小貼紙，每一句都有特別嘅意思 ，大家可以揀最鍾意嘅一句。
唔知大家睇完兩間新村花店嘅介紹又覺得點呢？之後嚟韓國又會唔會想買一紮之後拎住佢周圍去打卡呢？
「千里送花束，物輕情意重」如果想俾海外朋友一個生日或特別驚喜？都可以搵我哋代訂花束㗎！
代訂花束 ｜撳我
如果有更多想知嘅內容，都可以隨時留言或者dm話俾我哋知：）
Instagram： creatrip.hk
Facebook：Creatrip 帶你認識韓國每一面
韓國代購
Mail：help@creatrip.com